Руското Министерство за надворешни работи соопшти дека Вашингтон ја одбил поканата на Владимир Путин до американскиот претседател Џозеф Бајден за директни разговори.
Рускиот претседател го повика Бајден на видеоповик само еден ден откако неговиот американски колега го нарече „убиец“ и се закани со нов круг санкции против Русија.
Сепак, американската страна го отфрли предлогот на Путин за видеоповик што би се емитувал во живо, објави Sputnik International, пренесувајќи го соопштението на руското Министерство за надворешни работи.
„Со жалење известуваме дека американската страна не ја прифати поканата на рускиот претседател Владимир Путин, тој и американскиот претседател Бајден да разговараат преку видеоповик на 19 или 22 март и во таа прилика да разгледаат бројни проблеми што ги оптоваруваат односите меѓу двете земји“, се вели во соопштението.
Затоа Москва ваквиот потег на Вашингтон го оцени како „уште една пропуштена можност да стори нешто во областа на подобрување на односите меѓу Русија и Соединетите Американски Држави“.
„Колку што разбрав, американската страна не е подготвена“, рече портпаролот на Кремљ, Дмитри Песков.
Заменик-портпаролот на Белата куќа, Карин Жан-Пјер изјави дека состанокот ќе се одржи кога ќе дојде време.