Турскиот претседател Реџеп Тајип Ердоган побара од парламентот дозвола за испраќање на армијата во Азербејџан. Турската армија треба да учествува во руско-турската мисија за набљудување на примирјето во Нагорно Карабах.
Во барање до собранието, Ердоган бара одобрување за испраќање војници за формирање на „центар за координација“ со Русија за следење на почитувањето на примирјето.
Војниците испратени од Турција, земја што го поддржува Азербејџан, „ќе учествуваат во активностите на координативниот центар што ќе биде формиран со Русија“ и „ќе обезбедат почитување на примирјето“, се вели во барањето.
Тоа овластување за распоредување, што треба да биде само формалност, ќе важи за период од една година, а бројот на распоредени војници ќе го одреди Ердоган.
Азербејџан и Ерменија минатата недела потпишаа договор под покровителство на Русија, со кој се стави крај на повеќенеделните конфликти во Нагорно-Карабах, кој припаѓа на Азербејџан, а има мнозинско ерменско население.
Со цел да се следи почитувањето на примирјето, Москва започна да ги распоредува своите „мировници“ во последните неколку дена.
Иако Турција не е спомената во договорот, Анкара веднаш објави дека нејзините трупи ќе учествуваат во центарот за координација.
Турски и руски официјални лица разговараа во петокот и саботата во Анкара за модалитетите на работењето на центарот, чиј датум на отворање и локацијата не се објавени.
