Неизвесно е отворањето на границите низ Европа и светот, со оглед на тоа дека пандемијата уште е во тек и прашање е дали и кога ќе исчезне коронавирусот.
Со тоа неизвесни се и апсолутната слобода на движење на граѓаните и работната сила, класичниот пазар на труд и досега познатите законитости на работничката миграција.
Финансиските и работните пореметувања се особено видливи и со далекусежни последици, па клучно е владите да носат непоколебливи одлуки за ублажување на последиците и насочување на развојните процеси кон иднината.
Со корона-кризата постојниот образец за обезбедување работна сила едноставно беше прекинат, а расте бројот на нови невработени кои бараат работа дома или во странство. Од Агенцијата за вработување на Република Северна Македонија информираат дека во периодот од 11 март до 31 мај годинава 11.904 лица се стекнале со статус на невработени лица, за кои претходно имало регистрирана пријава во задолжителното социјално осигурување.
Се разгледува како ќе се продолжи со работа и како ќе се дефинираат новите обрасци за вработување, стимулативните мерки и миграциските политики за работна сила, како приоритетни елементи во носењето одлуки.
Токму тоа го потврдуваат последиците од кризата во Австрија и Германија, каде значително се намали потребата за работна сила од балканските земји, објави порталот Geopolitika News.
Според стручните проценки, корона-кризата ќе доведе до најголемата рецесија во Германија по Втората светска војна и раст на стапката на невработеност од 0,7% на 5,7%, како и нефункционален пазар на труд поради ограничувањето на контактите.
И во Австрија се случува слично сценарио: расте стапката на невработеност и тоа во повисок процент отколку во Германија во споредба со лани.
