Воениот злосторник Радован Караџиќ ќе го отслужи остатокот од доживотната казна затвор во Велика Британија.
Одлуката ја донесе Кармел Агиус, претседател на Меѓународните резидуални механизми за кривични судови, откако од Островот доби потврда дека земјата ќе го прими криминалецот да ја издржува казната.
„Имајќи предвид дека Жалбениот совет на Механизмот го осуди Радован Караџиќ на доживотен затвор, меѓу другото, Велика Британија го информираше Механизмот за подготвеноста тој да го спроведе остатокот од казната што му е изречена на Караџиќ од Механизмот. Со ова одлучувам дека Караџиќ ќе ја издржува казната во Велика Британија“, рече Агиус во известувањето испратено до засегнатите страни во постапката - обвинителот Серж Брамерц и адвокатот на Караџиќ, Питер Робинсон.
Тој додаде дека ќе биде официјално побарано од Владата на Обединетото Кралство да му изрече казна на Караџиќ, да се согласи на барањето, да го извести Караџиќ и да ги преземе сите неопходни мерки за да го олесни неговиот трансфер што е можно побрзо. Тој нареди Караџиќ да остане во притвор на Механизмот додека чека преместување.
