Рафа му се заблагодари на Ѓоќовиќ на српски

Српскиот тенисер Новак Ѓоковиќ и Шпанецот Рафаел Надал го одиграа последниот меч во кариерата во саудиски Ријад на егзибицискиот турнир „Слем шест кралеви“, а Ѓоковиќ уште еднаш му оддаде признание на својот голем ривал кој најави крај на кариерата.

Надал официјализираше дека кариерата ја завршува со настап на Дејвис купот на крајот на ноември со настап за шпанската репрезентација, а Ѓоковиќ го доби синоќешниот меч со 2:0 во сетови (6:3, 7:6).

„Последниот танц беше епски. И, се разбира, полн со емоции. Секогаш ќе го ценам нашето ривалство. Ќе му недостигаш на тенисот“, напиша Ѓоковиќ со заедничка фотографија, а потоа ги шокираше и организаторите на турнирот во Ријад.

„Салам алејкум Ријад. Слемот Шест кралеви е посебен турнир. Се гледаме наскоро“, напиша Ѓоковиќ на социјалните мрежи.

Надал ја сподели објавата на Ѓоковиќ на Instagram и му се заблагодари на српски.

На едно од најголемите ривалства во историјата на спортот му дојде крајот. Ѓоковиќ и Надал се сретнаа 60 пати во кариерата, а српскиот тенисер победи во 31 дуел, наспроти 29-те победи на Шпанецот.

Турнирот нема натпреварувачко значење и не носи бодови за АТП листата, на Саудијците не им беше тешко да ги привлечат „кралевите“ бидејќи победникот Јаник Синер однесе дома шест милиони долари, што е најголема парична награда во историјата на тенисот.

Секој од тенисерите само со доаѓањето на овој турнир заработи по најмалку 1,5 милиони американски долари, а покрај Синер и Алкарас, на турнирот учествуваа и Даниил Медведев, Холгер Руне, Рафаел Надал и Новак Ѓоковиќ.