Во интервју за Corriere della Serra славниот тенисер Рафаел Надал откри неколку лични работи за себе, од политички ставови и тенисот до ситуацијата со коронавирусот.
„Јас сум млад и мојата физичка состојба е многу добра, но ако се заразам јас, можам да заразам некој кој спаѓа во ризичната група. Се грижам за моите родители, за семејството и за општеството. Ова се најтешките моменти во нашиот живот и се многу поважни од тениски меч. Против пандемијата мора да се бориме со почит кон другите, кон оние кои ги сакаме и со разбирање и логика“, вели тенисерот, додавајќи:
„Луѓето умираат од вирусот, но може да умрат и од глад, важно е да ја најдеме рамнотежата меѓу здравјето и работата односно меѓу здравјето и социјалната заштита“, вели Надал.
Интересно е што 34-годишниот Шпанец е голем навивач на Реал Мадрид и покрај фактот дека неговиот тренер и чичко Тони Надал играше за Барселона.
„Татко ми и целото семејство отсекогаш биле мадристи. Кога мојот чичко почна да игра за Барселона, ние му дадовме поддршка. Потоа се врати во Мајорка и од тогаш бевме поделени, некои навиваат за Барселона, а некои за Реал Мадрид“, искрено призна Надал.
Поради проблеми со колената, многумина сметаа дека тенисерот ќе се пензионира пред триесеттата година, но тој има 34 години и сè уште игра на врвно ниво. Сепак, крајот на кариерата еднаш ќе биде неизбежен, а Надал ги откри плановите по пензионирањето.
„Ќе знам кога ќе биде крај кога ќе дојде времето. Тогаш ќе се посветам на децата. Мојата фондација помага на деца кои се во ризик од општествена изолација. Им даваме храна, образование и спорт. Работам и на проектот „Повеќе од тенис“, кој поддржува 20 училишта за деца со инвалидитет. Во Индија исто така имаме проект кој помага на децата во улиште да учат англиски јазик и информатика“, изјави Надал во интервјуто.