Истражувањето на меѓународен тим научници спроведено во 21 болница во Шпанија покажува дека ракот на дојка може да се лечи и без хемотерапија.
Научниците истражувањето го спровеле на нешто над 5 илјади пациентки низ Шпанија.
Речиси секоја осма жена во текот на својот живот може да пати од рак на дојка, што е главна причина за смртноста кај жените кои боледуваат од тумор, пишува Шпанската асоцијација за борба против рак. Поради тоа во оваа земја им се посветува големо внимание на истражувањата кои се поврзани со лекувањето на рак на дојки, па така истражувањето именувано како RxPONDER било спроведено во вкупно 21 шпанска болница.
Д-р Бегоња Бермехо, член на истражувачкиот тим кој се бави со рак на дојки при Универзитетската клиника во Валенсија, каде, помеѓу другите, е направено ова истражување, вели дека резултатите покажуваат како хемотерапијата не мора да се применува на жените во постменопауза кои боледуваат од хормонски (HR) позитивен карцином или HER 2 негативен карцином.
Научниците објаснуваат дека со таквиот пристап би им се олеснило лекувањето на заболените, бидејќи би се избегнале негативните ефекти од хемотерапијата.
„Според резултатите од истражувањето, исклучувањето на хемотерапијата кај оваа група на заболени, кај кои кај една третина биле зафатени и лимфните јазли, не ја влошува прогнозата. Согласно тоа, кај оваа група заболени, хемотерапијата не мора да се применува“, вели д-р Емилио Алба, шеф на онколошкото одделение при Универзитетската болница во Малага.
Истражувањето било спроведено кај повеќе од 5 илјади жени заболени од овие два типа на рак на дојка, кои се и најчестите подтипови кои ги погаѓаат заболените.
Стандардниот третман во лекувањето, кој се применува веќе три децении, е хемотерапија со хормонална терапија, а лекувањето може да трае со години. Научниците сега тврдат дека кај некои пациентки може да се дава само хормонална терапија, доколку тоа се потврди преку генски тест кој би дал одговори на веројатноста за повторна појава на канцерот и колку би била успешна хемотерапијата.