Македонската машка ракометна репрезентација го претрпе и четвртиот пораз откако потклекна пред четвртата по ранг африканска репрезентација, селекцијата на Тунис со 27:33.
Нашите ракометари лошо го отворија натпреварот и во првите неколку минути не можеа да го најдат патот до мрежата на Тунижаните, кои пак постигнуваа голови и поведоа со 5:0. Потоа Македонија го намалуваше водството кое гласеше 4, 3 и 2 гола разлика, наизменично менувајќи, сѐ до крајот на првото полувреме кога дојдовме и до -1, а на пауза се замина со 16:14 за Африканците.
Второ полувреме го почнавме далеку подобро. Откако Тунис го постигна својот 17-ти гол, Македонците направија серија од 4:0 и за првпат на овој натпревар дојдоа до водство (18:17). Водството го одржувавме во наредните неколку минути, а потоа откако Тунис израмни на 21:21 повторно почна да го контролира резултатот.
До крајот Тунижаните само го зголемуваа водството за на крајот да слават со 6 голови разлика и конечни 33:27.
Најефикасен на натпреварот беше Тунижанецот Мохамед Дармул со 8 голови, а потоа следуваа Филип Кузмановски и Дејан Манасков со по 7.
Овој пораз за Македонија значи дека најверојатно нема да бидеме први во Президентс куп групата, па со Мароко во 3. коло ќе се бориме за 2. место и плеј-оф за пласман на 27. место. Мароко денеска го совлада Алжир со 28:27. Натпреварот ќе се игра в понеделник од 18 часот.