Разочарување за фудбалска Европа: Осимхен ја одбра Саудиска Арабија

Завршен е трансфер кој ќе одекне низ фудбалска Европа и ќе ги разочара сите навивачи на Стариот континент. Одличниот напаѓач Виктор Осимхен е нов играч на саудискиот клуб Ал Ахли.

И покрај тоа што има само 25 години, а европските гиганти го бркаа неговиот потпис, Виктор Осимхен реши да го прифати повикот на саудиските пари и во наредниот период да игра за Ал Ахли.

Најблиску до негов трансфер во овој преоден рок беше Челси. На крајот „Сините“ извисија бидејќи Наполи постигна конечен договор за продажба на Нигериецот за сума од 75 до 80 милиони евра со бонуси.

Осимхен ќе заработува меѓу 25 и 30 милиони евра годишно во Ал Ахли со четиригодишен договор.

Веста за трансферот на Осимхен на Блискиот Исток ја потврдија и најугледните медиуми од Италија, меѓу кои и новинарите Фабрицио Романо и Џанлука Ди Марцио, како и Sky Sport.

Неговиот лекарски преглед во Саудиска Арабија е веќе закажан и ќе биде направен денеска во текот на денот.

Заминувањето на уште една ѕвезда, особено во неговите најдобри играчки години, е тежок удар за европскиот фудбал. Стрелецот на 76 гола во 133 натпревари за Наполи можеше да остави длабока трага во Европа и Лигата на шампионите, но реши да прифати профитабилна понуда од Истокот.ж

Наполи веќе ја обезбеди неговата замена откако синоќа го потпиша Ромелу Лукаку од Челси, кој минатата сезона ја мина на позајмица во Рома.