Советникот на Ред Бул, Хелмут Марко, изјави дека тимот ангажирал адвокат да го преиспита судирот меѓу Макс Верстапен и возачот на Мерцедес, Луис Хамилтон, на трката во неделата во Силверстоун.
Стјуардите го казнија Луис со казна од 10 секунди, што не го спречи да ја освои трката за Големата награда на Британија.
„Адвокатот треба да провери што може да се направи во оваа ситуација во рамките на законодавството за спорт. Макс има многу среќа што не му се случи ништо сериозно. Автомобилот е скршен, веројатно исто и моторот. Не можете да поминете низ тоа така. Суспензија за трката би било праведно решение. Правилата мора да се ревидираат – ова исто така важи и за работата на стјуардите. Перес доби две казни од по 5 секунди во Австрија за лесен контакт кога никој не излета од патеката. Хамилтон за многу поголем инцидент доби казна од 10 секунди. Макс беше на својот пат, а Хамилтон мораше да си остане на својот правец. Не можете да удрите во противникот во еден од најбрзите свиоци, каде што лесното допирање може да доведе до фатални последици. Хамилтон треба да знае за ова“, рече Марко.
Инцидентот се случи уште во првиот круг, по што Верстапен остана без пласман и заврши во болница на превентивни прегледи, додека Хамилтон на крајот победи и покрај казната од 10 секунди која предизвика големи реакции кај љубителите на Формула 1.
