Ред Бул го суспендираше својот тест и резервен возач Јури Випс поради расистички навреди употребени од младиот возач за време на пренос во живо додека играше видео игра, а тимот најави „целосна истрага“ за инцидентот.
Випс синоќа во живо пренесуваше како игра во видео игрица и притоа користеше расистичка навреда, а Ф1 тимот на Ред Бул, за кој естонскиот возач е врзан како тест-возач и член на јуниорската програма, веднаш реагираше и соопшти дека е привремено суспендиран.
„Ред Бул Рејсинг го суспендираше јуниорскиот возач Јури Випс од сите должности со моментален ефект, додека ги чекаме резултатите од целосната истрага за инцидентот“, се вели во соопштението.
„Како организација го осудуваме малтретирањето од секаков вид и имаме нулта толеранција за расистички јазик и однесување во нашата организација.
Випс повеќе пати преку својот Instagram профил „безрезервно се извини“ за навредливиот говор што го употреби за време на преносот во живо.
„Овој јазик е целосно неприфатлив и не ги опишува вредностите и принципите до кои се придржувам“, напиша Випс.
„Длабоко жалам за моите постапки и ова не е пример што сакам да го дадам. Целосно ќе соработувам со истрагата“.
Випс го имаше своето деби во Формула 1 за време на овогодинешното шпанско ГП кога се натпреваруваше на првиот слободен тренинг, а моментално е активен Формула 2 возач каде вози за британскиот тим Хајтек Гран При.
Естонецот е на седмото место во поредокот кај возачите, а на последната трка во Баку имаше судир на четири круга пред крајот додека беше на водечката позиција.
