Рекордни 351 автор од сите континенти се пријавија на единаесеттиот по ред Меѓународен салон за стрип „Велес 2024“.
Сите пристигнати дела ќе бидат прегледани од жири комисија составена од стрип и ликовни дејци од Велес, а дел од нив ќе бидат изложени на свеченото отворање на Меѓународниот стрип салон во Велес на 20 август, најзначајна стрип манифестација кај нас.
Според Томе Трајков, програмски координатор на Стрип центарот на Македонија, големата бројка се должи пред сѐ на засилената работа и контакти со млади таленти од Македонија. „Многу радува податокот за откривање на нови стрип имиња од македонската стрип сцена коишто заслужуваат поголема афирмација и внимание. Тоа е секако одраз и на реализацијата на соработката со училиштата ширум државата, како и со ликовните педагози. Исто така, медиумската промоција на стрип настаните во странство на коишто учествува македонската стрип сцена секако дека има позитивно влијание“.
„Што се однесува до мегународните контакти, добра основа претставува и постојаната соработка со стрип сцената од поранешните Ју републики, но секако и комуникацијата со автори од сите континенти, вклучително и Тајван и САД. За зголемување на нивниот број секако треба и зголемена поддршка од страна на донаторите, како на пример: зголемен фонд на награди, присуство на наградените автори на свеченото отварање, составување на жири од меѓународни стрип автори и т.н.…“, потенцира Трајков.
Меѓународниот стрип салон во Велес, како и другите пропратни активности е финансиран од Министерството за култура на Македонија како и Општина Велес.
