Роботи од денеска почнаа да доставуваат топли оброци од ресторани до клиенти во централното градско подрачје на Москва, соопшти нивниот оператор, рускиот интернет гигант Yandex.
Апликацијата Yandex.Eats (Yandex.Eda на руски), еден од неколкуте сервиси за достава на храна и намирници во Москва, им нуди на клиентите низ деловната област Бели трг, оброците да им ги доставува робот наместо луѓе.
Малата „армија“ од 20 роботи наречени Yandex.Rover од есенва доставува намирници во одредени делови на Москва како дел од пилот-програмата, а сега разнесуваат и топли оброци. Сега постепено се проширува и областа за испорака, изјави портпаролката на Yandex.
Роботот зема нарачки од ресторанот и му ги носи на клиентот, кој потоа го отклучува роботот со помош на смартфон и ја зема храната.
