Ракометната федерација на Македонија одлучи да стави крај ан тековната сезона без прогласување на шампион, испаѓање нема да има, а наредната сезона лигата ќе брои повеќе клубови.
Откако денеска претседателот Стево Пендаровски прогласи продолжување на вонредната состојба во земјава, прв спортски субјект кој се затекна погоден од оваа одлука е РФМ која прогласи крај на сезоната.
„Во рамки на превентивните мерки и донесените уредби од страна на Владата, ракометните натпревари во сите категории во домашното првенство се во мирување. Воедно ве известуваме дека Ракометната федерација на Македонија е во секојдневна комуникација со надлежните институции со единствена цел за навремено информирање и спроведување на мерките за превенција од Covid-19. Земајќи ја предвид прогласената вонредна состојба во државата како и продолжувањето на истата заклучно со 15.05.2020 година, дополнително и самиот факт дека поголемиот број договори на ракометарите/ките со клубовите имаат валидност заклучно до 31.05.2020 година, како и насоките од Европската ракометна федерација за завршување на националниот систем на натпревари до 31.05.2020 година, се наметнува заклучокот дека моменталната состојба не дозволува и не постојат реални услови за регуларно завршување на домашното првенството. За сезоната 2019/2020 година ќе биде доставен предлог до УО на РФМ да нема прогласување на победник во националниот систем на натпревари во сите конкуренции и категории, истиот предлог ќе биде доставен и за Купот на Македонија 2020 година. Местата во Европските клупски натпреварувања во ЕХФ и местата во регионалната Сеха Лига ќе бидат распределени согласно критериуми од страна на УО на РФМ“, се вели во соопштението на РФМ.
Бидејќи нема шампион, нема ни испаѓање. Како што информираат од суперлигашот Пролет од Скопје, наредната сезона на Суперлигата ќе ѝ се прикличат дури 4 нови екипи, по две од двете второлигашки групи. Тие клубови би требало да бидат Астарион, Прилеп, Тиквеш и КЛ7.
Суперлигата се прекина со 17. коло кое за еден натпревар не беше комплетирано.
Требаше да се одигра уште само едно коло за да заврши регуларниот дел и потоа во плеј-офот ќе се приклучеа Вардар и Пелистер.
