Славниот американски режисер Ридли Скот смета дека младите генерации и новата технологија се виновни за неуспехот на неговиот нов филм „The Last Duel“.
Филмот не предизвика голем интерес кај публиката, а Скот во интервју изјави дека денешната публика израснала користејќи мобилни.
„Милениумците не сакаат да чујат за нови работи по друг пат, слушаат единствено ако им се обратите преку мобилните“, вели Скот.
Филмот во текот на првиот викенд од прикажување заработи 27 милиони долари во киносалите низ светот, што е многу малку со оглед на тоа што за него е одвоен буџет од 100 милиони долари. Скот истакна дека продукцијата на филмот направила одлична работа со промоцијата и дека не се виновни за фактот дека приказната за филмот не допре до поголем број луѓе.
Скот смета дека и ова искуство, како и претходните, носи важни лекции кои ќе му послужат во понатамошната работа.
„Не може секогаш да победуваме. Никогаш не сум се покајал за ниту еден снимен филм, научив критички да ја согледувам мојата работа. Ќе продолжам понатаму, нема премногу да размислувам за овој проект“, вели тој.
Главните улоги во филмот ги толкуваат Мет Дејмон, Адам Драјвер, Џуди Комер и Бен Афлек.
