Луѓето заразени со позаразната варијанта на коронавирусот SARS-CoV-2, која за прв пат беше откриена во Велика Британија, имаат поголем ризик од хоспитализација, покажа студијата на данскиот институт Серум објавена вчера.
Од 2.155 лица заразени со варијантата B117, 128 се хоспитализирани, што е за 64 проценти повеќе од заразените со другите варијанти, се вели во студијата.
Резултатот од данската студија е сличен на истражувањето спроведено на почетокот на овој месец во Велика Британија, додава институтот во соопштението.
Варијантата B117 стана доминантна во Данска минатата недела и претставува скоро две третини од сите нови инфекции, додека на почетокот на годината, британската варијанта претставуваше само 5 проценти од сите случаи.
„Има зголемување на бројот на заболени од COVID-19 во државава. Во овој момент сѐ уште траат испитувањата во лабораторијата во МАНУ. Во текот на вчерашниот ден имав разговори со претставници на лабораторијата од клиниката ‘Жан Митрев’, каде британскиот сој е присутен во 70 проценти. Очигледно е дека се зголемува бројот на заболени, а еден дел од ова зголемување на бројките се должи и на присуство на тој сој на вирусот, кој полесно се пренесува“, изјави министерот за здравство Венко Филипче за состојбата со корона-кризата кај нас.