Околу 150.000 евра треба да се издвојат за завршните работи на првиот Rolls-Royce, зад кој стои познатата германска компанија Delta 4x4.
Меѓу најновите проекти на германската компанија Delta 4x4, која се занимава со „über“ теренци за сите (не)прилики, е и темелно модифицираниот Rolls-Royce Cullinan, што е доказ дека има богати луѓе кои не мораат да спијат во луксузни хотели за време на нивните патувања.
Изменетиот Cullinan Overlander, нарачан од клиент од Блискиот Исток, е поставен на засилени тркала од 20 инчи на кои гумите Mickey Thompson имаат изразен теренски профил. Со измените на адаптивната суспензија, подот е поместен за дополнителни 80 милиметри од подлогата, а на фотографиите не се гледаат многуте панели кои ја штитат суспензијата, моторот и елементите на менувачот.
Она што може да се види се продолжените браници, доводот за воздух за поминување низ длабока вода и дури десет дополнителни светилки кои се наредени на „bull bar-от“ и галеријата каде покрај лопати и канистри за гориво има и склопен шатор за спиење далеку од цивилизацијата.
Цената за комплетната доработка е околу 150.000 евра, а Delta не се занимавала со содржината под хаубата, па авантуристичкиот Cullinan работи со 6,7-литарски V12 битурбо мотор кој развива 571 КС и 850 Nm вртежен момент, кој е распределен на двете оски со 8-брзински автоматски менувач.