Тестниот прототип на првиот електричен Rolls-Royce последниве денови се справуваше со екстремно ниските температури на воздухот на работ на Арктичкиот Круг.
Како дел од немилосрдното тестирање во кое прототипите на Rolls-Royce Spectre ќе поминат 2,5 милиони километри низ целиот свет, тимови од инженери и тест возачи ги поминуваат своите последни денови во Северна Шведска испитувајќи го Арктичкиот круг за да тестираат како првиот електричен RR се справува со екстремно ниските температури на воздухот кои се спуштаат до -25 степени Целзиусови.
Фотографиите од темелно камуфлираниот прототип што ги објави познатата британска автомобилска компанија под покровителство на BMW не откриваат многу, но засега е познато дека купето долго 5,18 метри седи на тркала од 23 инчи и крие батерии тешки околу 700 килограми. Електричните мотори ќе произведуваат околу 600 КС и повеќе од 1.000 Nm вртежен момент кој ќе биде распределен на двете оски.
Spectre се базира на платформата што Rolls-Royce ја користи за моделите Ghost, Phantom и Cullinan. Сериското издание ќе биде готово пред крајот на 2023 година, а првиот електричен RR ќе чини околу 355.000 евра.
Претходно беше најавено дека Rolls-Royce од 2030 година ќе произведува модели кои ќе се движат само со електрични мотори.
