Лука Модриќ (39) веќе 13 години игра за Реал Мадрид. Неговиот договор со клубот каде е капитен, легенда и најодликуван фудбалер во историјата му завршува на последниот ден од јуни. Засега нема индикации дека Реал ќе му го продолжи договорот, но клубот не прави нешто такво до самиот крај на сезоната или кога му истекува договорот на Модриќ.
Со оглед на возраста на Модриќ, во последните години клубот му ги продолжи договорите на уште една година. Сепак, Модриќ во септември ќе наполни 40 години, па сè почесто се зборува дека ова би можеле да бидат неговите последни месеци во најголемиот клуб.
Што се однесува до Модриќ, нема сомнеж. И по 579 натпревари и 28 трофеи, тој сè уште сака да игра за Реал. За ова пишува и Фабрицио Романо: „Лука Модриќ само сака да остане во Реал уште една сезона. Тој е желен да остане во клубот и да продолжи да биде дел од тимот со потпишување на продолжување на договорот до летото 2026 година“. Најсигурниот извор од фудбалскиот пазар повторува: „Уште еднаш, првиот избор и прва опција на Модриќ секогаш е Реал“.
Модриќ оваа сезона забележа 44 настапи за Реал, од кои 20 како член на првиот тим. Тој постигна четири и постави седум гола за тимот кој се бори за тројната круна, а го чека Светското клупско првенство во лето. Модриќ ќе игра во новото натпреварување доколку го продолжи договорот со Реал.
