Интервјуто кое Роналдо пред пет дена го направи со Пирс Морган и натаму е топ тема во фудбалскиот свет, а секој ден се зборува за различни теми за кои славниот Португалец го искажа своето мислење.
Роналдо во интервјуто истакна дека се чувствува изневерено во Јунајтед, како од челниците на клубот и тренерот, така и од соиграчите.
Имено, откри дека добро мислење има само за тројца играчи, додека за останатите, особено за младите, нема ништо убаво да каже.
„Почитувам само тројца соиграчи во Јунајтед, бидејќи се грижат за успехот. Диогу Дало е паметен, интелигентен и многу професионален иако е млад и не се сомневам дека долго ќе игра на врвно ниво. По добро можам уште да ги споменам Лисандро Мартинес и Каземиро“, рече Роналдо.
Дало има 23 години и е негов сонародник и соиграч од репрезентацијата на Португалија. Аргентинецот Мартинес има 24 години и со Роналдо прв пат заигра заедно во Манчестер. Со 30-годишниот Каземиро долги години настапуваше во Реал Мадрид.
Како што истакна, младите играчи денес не ги почитуваат постарите и тоа е случај насекаде, не само во Јунајтед.
„Младите играчи не ги почитуваат искусните и постари играчи, но тоа донекаде и го разбирам бидејќи живеат во друга ера. Сега до некои работи доаѓаат многу полесно, воопшто не се мачат, им е гајле. Се прават дека слушаат, но од едно уво сѐ им влегува, а од другото им излегува“, објасни тој, не криејќи го своето разочарување од тоа.
„Навистина е штета што младите играчи имаат најдобар пример пред себе, но не сакаат ни да се обидат да го следат“, рече Португалецот.
Морган го праша дали со тоа мисли на себе.
„Да, јас сум тој пример. Секое утро прв доаѓам на тренинг и последен си заминувам“, додаде Роналдо.
