Португалскиот ас постигна вистински еврогол синоќа со што конечно успеа да затресе мрежа годинава бидејќи последен пат тоа го направи на крајот од декември.
Фудбалерите на Манчестер Јунајтед синоќа низ доста маки запишаа победа над Брајтон со 2:0, а на триумфот му кумуваше Португалецот.
Јунајтед на своите навивачи им приреди три разочарувања. По испаѓањето во ФА купот од второлигашот Мидлсброу, „Црвените ѓаволи“ не успеаја да ја задржат предноста против Барнли и Саутемптон во дуелите во кои се очекуваше триумф, па победа синоќа беше повеќе од потребна.
Во првиот дел немаше многу шанси па на одмор се замина без голови. Потоа, во 51. минута се случи најубавиот момент на натпреварот кога Роналдо после дриблинг одлично се намести на шут и постигна убав гол.
До крајот Брајтон остана со играч помалку, а потоа во последните моменти Бруну Фернандеш ги постави конечните 2:0.
Роналдо последен пат постигна гол на 30 декември 2021 година во 3:1 победата над Барнли. Постот го почна на 3 јануари кога не погоди во поразот од 0:1 од Вулверхемптон, пост кој траеше сѐ до синоќа.
Во меѓувреме, поради повреда не играше на двата едноподруго натпревари со Астон Вила во ФА купот и Премиер лигата, а постот го продолжи против Брентфорд, Вест Хем, Мидлсброу, Барнли и Саутемптон, односно цел јануари го мина во зимски сон.
Синоќешниот гол за Роналдо беше 9-ти сезонава во Премиер лигата, а вкупно 15-ти бидејќи има и 6 во Лигата на шампионите.