Роналдо: Не бркам рекорди, тие ме бркаат мене

Португалскиот играч на Ал Наср, Кристијано Роналдо, го собори рекордот на Професионалната лига на Саудиска Арабија по број на постигнати голови во една сезона. Фудбалерите на Ал Наср синоќа го победија Ал Итихад со 4:2 во натпреварот од последното 34. коло од првенството на Саудиска Арабија.

Роналдо на овој натпревар постигна два гола, па сезоната ја заврши со 35 голови. Португалецот стана играч со најмногу постигнати голови во една сезона во првенството на Саудиска Арабија. Тој за еден гол го собори рекордот на поранешниот играч на Ал Наср, Абдеразак Хамдала, кој постигна 34 голови во сезоната 2018/2019.

Второто место на листата на стрелци сезонава му припадна на напаѓачот на Ал Хилал и српски репрезентативец, Александар Митровиќ, кој постигна 28 голови.

Роналдо е единствениот играч кој бил најдобар стрелец во четири различни лиги. Покрај во Саудиска Арабија, тој претходно беше најдобар стрелец и во Премиер лигата, Ла Лига и во Серија А. За тоа се пофали и на Х.

„Не бркам јас рекорди, тие ме бркаат мене“, потоа додаде на Х.

Сепак, Роналдо и втора сезона по ред во Саудиска Арабија остана без шампионската титула која сега ја освои екипата на Ал Хилал со 96 бодови и без пораз, додека неговиот Ал Наср заврши втор со 82 бода. Лани пред тимот на Португалецот беше Ал Итихад.

Роналдо сепак може сезонава да освои трофеј со Ал Наср оти неговиот клуб е во финалето на Кинг купот каде на 31 мај игра против Ал Хилал на „Крал Абдула“ стадионот во Џеда.