Кристијано Роналдо го одигра првиот натпревар сезонава за Манчестер Јунајтед во сенка на големата желба да го напушти клубот од „Олд Трафорд“.
Манчестер Јунајтед на „Олд Трафорд“ го одигра последниот подготвителен натпревар пред почетокот на новата сезона во Премиер лигата, а настапи Кристијано Роналдо, што за него беше всушност прв натпревар летово откако ги пропушти цели подготовки барајќи си нов клуб кој се натпреварува во Лигата на шампионите.
Сепак, очигледно немотивираниот Португалец не импресионираше против Рајо Ваљекано и беше единствениот играч што тренерот Ерик тен Хаг го замени на паузата. Роналдо беше одлично прифатен од навивачите кои сакаат тој да остане, но желбата на Португалецот да си замине од тимот е поголема од кога и да е, тоа го покажа со тоа што го напушти стадионот пред крајот на натпреварот, што беше фотографирано од сведоци. По ваквиот потег Роналдо беше жестоко критикуван од клупските следбеници.
Манчестер Јунајтед одигра само 1:1 против шпанскиот прволигаш. Домашните поведоа преку Амад Диало во 48. минута, а Алваро Гарсија израмни 10 минути подоцна. Помеѓу стативите на гостинскиот гол првото полувреме го мина македонскиот репрезентативен голман Столе Димитриевски.
Јунајтед ја отвора новата сезона во Премиер лигата в недела против Брајтон. Не се знае дали Роналдо ќе биде дел од овој натпревар.
Роналдо летово се поврзуваше со бројни клубови, но засега нема ништо конкретно околу неговата нова средина. Го одбија Баерн, ПСЖ, Челси, Интер, тој ја одби Рома бидејќи не игра во Лигата на шампионите, а последна вест е дека во игра влегле Наполи и Спортинг.