Фудбалерите на Португалија го победија Уругвај со 2:0 во натпреварот од 2. коло од групната фаза на Светското првенство во Катар и станаа третата репрезентација која обезбеди пласман во осминафиналето пред последниот натпревар во групата.
Двоен стрелец во победата на Португалија беше Бруно Фернандеш.
Првиот гол, самиот призна по натпреварот, беше постигнат случајно во 54. минута. Тој ја испрати топката со десната нога од левото крило, таа го прелета Кристијано Роналдо и го измами уругвајскиот голман Серхио Роше. Во третата минута од продолжението реализираше пенал за да го постави конечниот резултат.
Посебна приказна е ситуацијата со првиот гол. Снимки од различни агли и зумиран момент на приближување на топката до главата на Роналдо се обиде да одговори кој всушност го постигна воведниот гол. Иако не го прослави со вообичаеното „сиуу“, Роналдо ги напна мускулите, ги крена рацете во воздух и гестикулираше како го смета за свој. Тоа го направи и по натпреварот кога играчите го напуштаа теренот.
Фернандеш: Ја подавав топката
Португалските репрезентативци мафтаа и ракоплескаа кон публиката, а во тие моменти камерата го сними и Роналдо, кој на некого на клупата му покажува дека ја допрел топката со глава. По сè, тој сепак ги рашири рацете покажувајќи како да не разбира зошто голот не му е заслужен. На Бруно Фернандеш не му беше гајле.
„Мислев дека Кристијано ја допре топката. Му ја подавав. Ние сме добар тим и не е важно кој ќе го постигне голот. На сите ни беше важно само што го постигнавме“, изјави двојниот стрелец по натпреварот.
Вистинскиот одговор за стрелецот го решава технологијата. Топката Adidas која се користи на Светското првенство во Катар има сензори кои го даваат одговорот на прашањето за стрелецот бидејќи реагираат и на најмал допир. При првиот гол португалската репрезентација не се огласи и ФИФА му го припиша голот на Фернандеш.