Во моментов нема женски возачи во Формула 1 и ниту една не се поврзува со место во болидот за следната сезона, но поранешниот шампион Нико Росберг верува дека тоа наскоро ќе се промени.
Тимот на Алпин ја лансираше програмата Rac(H)er, која има за цел да ги зголеми можностите за жените да добијат шанса во Формула 1 кога тоа ќе го заслужат со своите перформанси. Во принцип, се чини дека ова е долгорочен проект.
„Нашата улога како Ф1 тим и бренд на Groupe Renault е да го направиме нашиот екосистем поинклузивен и да ја направиме различноста наша сила. Свесни сме за потребата од длабока трансформација на спортот и индустријата за да можат сите таленти да процветаат во иднина. Со лансирањето на Rac(H)er, програмата започнуваме со трансформација и се надеваме дека сите играчи во секторот ќе ни се придружат бидејќи само обединети можеме да направиме вистински напредок. Тоа би бил вистински успех“, изјави директорот на Алпин, Лоран Роси.
Во Алпин се очекува дека до 2027 година 30% од работната сила ќе бидат жени, додека во моментов тие се само 12%.
„Брилијантните иницијативи како онаа на Алпин им даваат шанса на жените. Дефинитивно ќе има жени во Формула 1 наскоро. Се разбира, за сите ќе биде подобро ако повеќе тимови се посветени на еднаквите права. Но, тоа не е само прашање на мажите и жените, туку исто така и бојата на кожата. Треба да се направи повеќе, особено во мотоспортот. Ако го погледнете падокот во Формула 1, има многу белци и малку жени. Би било убаво тоа да се смени“, изјави Росберг.
Тој додаде дека му е јасно дека патот не е лесен, а се обидува да им даде шанса на жените во неговиот Росбер Икс Рејсинг Тим во серијата Екстрим Е.
