Руската репрезентација и клубовите од таа земја би добиле шанса повторно да играат меѓународни натпревари, но далеку од Европа.
Додека трае Мундијалот во Катар, европскиот фудбал би можело да доживее неочекувана промена. По речиси една година суспензија од сите натпреварувања, Русите размислуваат да ги напуштат сите натпреварувања под капата на УЕФА и да се преселат во Азија.
Ваквата одлука ќе им овозможи на репрезентацијата и клубовите повторно да се натпреваруваат на меѓународна сцена, што им е забрането уште од март 2022 година.
За овие размислувања на фудбалска Русија претходните денови пишуваа тамошните медиуми, но и некои од најугледните европски весници. Сите се повикуваат на изјавата на претседателот на Руската фудбалска федерација, кој своевремено беше против таа опција, но...
„Пред неколку месеци кажав дека е прерано да се размислува за Азија, но сега верувам дека тоа е можност што треба да се разгледа“, изјави претседателот на Сојузот Александр Дјуков, пренесуваат руските медиуми. На неговата изјава се повикува француски L'Équipe, угледен весник кој консултирал политиколози и заклучил дека постојат големи шанси овој трансфер навистина да се случи.
Потсетуваме, во февруари ФИФА и УЕФА донесоа одлука да ги суспендираат сите руски клубови и репрезентацијата од нивните натпреварувања, откако Москва започна „специјална воена операција“ на истокот на Украина. Репрезентацијата и клубовите кои настапуваат во европските натпреварувања поднесоа жалба до Судот за спортска арбитража, но не успеаја да ја добијат таа постапка, па во текот на претходната сезона не можеа да играат натпревари против европски селекции.
На оваа тема своевремено зборуваше и Дјуков.
„Сè уште не сум разговарал со претставниците на Азија, бидејќи Европа нè гледа како дел од семејството. Би било непристојно од нас зад нивен грб да влеземе во преговори“, изјави тогаш првиот човек на рускиот фудбал. Очигледно во последно време ситуацијата се промени, па и Русите размислуваат за алтернативи.
Потсетуваме, доколку Русија ја напушти УЕФА и почне да се натпреварува во АФЦ, нивната репрезентација би се обидела да стигне до Светското првенство преку азиските квалификации, каде за ривали се селекциите како Јапонија, Австралија, Јужна Кореја, Иран, Саудиска Арабија. ,... Исто така, екипите би играле клупски натпреварувања во Азија, што би било многу интересно да се види.
