Се огласи и Руската амбасада во САД за оштетениот гасовод Северен поток и истекувањето гас, прашувајќи кој би можел да има користи од оштетувањето.
„Забележуваме обиди на некои американски официјални лица за инцидентите да ги обвинуваат Русите. Можеби имаат подобар поглед од врвот на Капитол Хил. Ако е тоа случај, тие исто така морале да ја видат активноста на американските воени авиони на самото место на руската инфраструктура ден претходно. Или забележале дека таму летаат дронови и хеликоптери. Или ги набљудуваат вежбите на американската морнарица со подводни експлозиви кои се спроведуваа пред некое време на истото место.
Тоа што е очигледно е што оние кои размислуваат за инцидентот како да забораваат да го постават главното прашање: кој има корист од оштетување на гасоводот? Од наша страна, инсистираме на потреби на сеопфатно и објективно испитување на околностите на нападот без преседан на руските гасоводи. Руската Федерација за расправа по ова прашање ќе повика вонреден состанок на Советот за безбедност на ОН“, објави Амбасадата на Телеграм.
