Руската влада вчера соопшти дека официјално ги прогласила Соединетите Американски Држави и Чешка за непријателски држави и дека американските дипломатски мисии веќе не можат да вработуваат локален персонал, додека чешките мисии можат да вработат најмногу 19 лица.
Рускиот претседател Владимир Путин минатиот месец потпиша закон со кој се ограничува бројот на локални вработени кои работат во странски дипломатски мисии и други агенции и и нареди на владата да состави список на „непријателски“ држави во кои ќе се применуваат ограничувања, пренесува Ројтерс.
Американско-руските односи веќе подолго време се во постојан пад поради обвинувањата на Вашингтон за руско мешање во претседателските избори, шпионажа и сајбер напади. Американската администрација воведе нови санкции во април.
Руската одлука е донесена само неколку дена пред најавената прва средба меѓу американскиот државен секретар Ентони Блинкен и рускиот министер за надворешни работи Сергеј Лавров.
Руско-чешките односи беа сериозно погодени минатиот месец кога Чесите го обвинија руското воено разузнавање дека стои зад експлозијата во складиштето за муниција во 2014 година и протераа десетици руски дипломати.
Русија ги негираше обвинувањата и возврати со протерување на чешки дипломати, а исто така им нареди на Чесите да отпуштаат поголем дел од своите локални вработени во Москва, од кои многумина беа вработени во чешки угостителски и деловни центри во градот.
Чешкото Министерство за надворешни работи во петокот рече дека одлуката на Русија е спротивна на меѓународниот договор со кој земјите се обврзуваат да дозволат правилно функционирање на дипломатските мисии.
Чесите сметаат дека акцијата на Руската Федерација е дополнителна ескалација на спорот меѓу двете земји, се вели во соопштението на Министерството.
