Рускиот претседател Владимир Путин се соочи со неочекувано прашање од Русинка која го праша дали може да живее со примања од 170 долари месечно.
Путин беше во посета на неговиот роден град Санкт Петербург, каде отиде да положи венец на гробот на неговиот политички ментор Анатолиј Собчак. Околу се собраа љубопитни минувачи и скоро сите го снимаа и фотографираа со мобилни телефони.
Од масата се издвои една жена и спонтано го соочи Путин со прашањето: Ве молам кажете ми дали можете да живеете со 10.800 рубљи (170 долари) месечно?
„Мислам дека е многу тешко“, одговори Путин на прашањето.
„Вашата плата сигурно изнесува околу 800.000 рубљи, претпоставувам“, продолжи жената.
„Па да“, одговори Путин и додаде дека во Русија има луѓе кои заработуваат многу повеќе и дека претседателот „нема највисока плата“.
Жената која живее од социјални примања за лица со инвалидитет, влезе во дискусијата околу трошоците за живот, очигледно сомневајќи се дека Путин има познавања од овие статистички податоци.
Пазарење во продавница чини најмалку 1.000 рубљи, а за сметки за станот требаат најмалку 4.000, рече жената.
Иако Путин супериорно владее во комуникацијата со јавноста при обраќања на голема публика со внимателно подготвени прашања, тој ретко излегува на улица поради непредвидени средби со „обичниот народ“.
За време на неговиот престој во Санкт Петербург, Путин зборуваше за најновите политички иницијативи за подобрување на условите за живеење на семејствата со деца, како зголемување на висината на детскиот додаток и финансиските стимулации за раѓање деца.
„Вие, секако, сте во право, имаме уште многу општествени проблеми кои владата мора да ги реши“, ѝ рече Путин на жената.
„Зошто тогаш не ги решавате?“, му врати таа.
„Ги решаваме“, ѝ одговори Путин.
Потоа жената го замоли Путин да се фотографира со него.
Иако сѐ изгледаше многу спонтано, се поставува прашањето дали ова беше само уште еден трик за публицитет на „вечниот владетел“.
