Рускиот ММА фајтер Сергеј Каритонов се најде во болница откако беше брутално нападнат од рускиот УФЦ борач Адам Јандиев. Инцидентот се случи за време на Battle of Champions во Москва, настан на кој и двајцата присуствуваа.
Каритонов ќе биде во болница најмалку 10 дена поради скршен нос и фрактура на слепоочницата, повреди здобиени по силните удари од Јандиев. На снимката јасно се гледа дека Каритонов не очекуваше дека УФЦ борачот ќе го нападне, па додека разговараа рацете му беа во џеб.
Полицијата спречи поголем инцидент, пренесе RT.
Каритонов од болница ја објасни целата ситуација што се случи пред неколку дена. Рускиот ветеран откри дека односот меѓу двајцата пријатели се влошил поради долг од 25.000 евра кои Каритонов му ги позајмил на Јандиев, за да отиде на подготовки во Тајланд.
„Почувствував дека ме удри со нешто, со нешто во левата рака. Знам дека секогаш носи со него боксирач.
Сакам да им се обратам на сите професионални спортисти. Никогаш не ја користете вашата сила надвор од спортските терени, користете ја само во случаи кога вашите блиски се загрозени. Најстрашно е кога луѓето во сала се посебно подготвени за извршување насилство. Тренерите се тие кои треба да ги спречат таквите поединци и да ги исфрлат од терен. Јас сум трениран спортист, а се најдов во ваква ситуација. Сигурно ќе бидам без борба барем 3 месеци, а тука се и фрактурите, модринките... Учете од туѓите грешки“, порача 40-годишниот Русин.