Новиот репер на хоризонтот на Големото јаболко има рекорден сооднос висина-ширина од 24:1 и може да содржи само еден луксузен апартман по кат.
Додадени се последните елементи од надворешната обвивка на супервисокиот облакодер во Њујорк, познат како Steinway Tower, кој е и најтенкиот во светот и втор највисок на западната хемисфера.
Кулата висока 435 метри, чиј дизајн го потпишуваат SHoP Architects, беше завршена минатата недела, а инвеститорите најавија дека е подготвена да се вселат првите станари.
Сместена во таканаречениот Ред на милијардери во центарот на Менхетен, кулата ја достигна својата супервисочина во 2018 година, а со сооднос висина-ширина од 24:1, се смета за најтенкиот облакодер во светот.
Steinway Tower беше најавена во 2013 година, за следната година проектот да започне со полна брзина, но изградбата запре во 2017 година поради финансиски причини.
Според архитектите од SHoP, кулата е изградена од бетон со најголема цврстина во светот.
Steinway Tower може да содржи еден луксузен стан по кат, плус 14 во дел од зградата наречена Steinway Hall, достигнувајќи вкупно 60 станбени единици.
„Секоја предрасуда што ја имаше нашиот тим за облакодерите во Њујорк беше заменета со можност да се направи нешто што никогаш досега не било направено“, изјави Грег Паскварели, директор на SHoP Architects, за Dezeen.
„Како њујорчани, ние сме неверојатно горди што можеме да додадеме нова икона на нашиот хоризонт“, додаде тој.
Зградата се стеснува до прав раб на врвот. Нејзините источни и западни фасади се покриени со теракота плочки со бронзени акценти, додека стаклените ѕидни завеси гледаат кон Централ Парк на север и Долен Менхетен на југ.
Во зградата има и 25-метарски базен, како и други луксузни содржини, вклучувајќи приватна трпезарија и фитнес центар со двојна висина со тераса, додека ентериерот го направи Studio Sofield.
