Санкциите наметнати на Русија поради инвазијата на Украина ѝ нанесоа тежок удар и на автомобилската индустрија, а тешкотиите во увозот на делови директно ги засегаат купувачите и сопствениците.
Недостигот на делови ја принуди Lada, чија матична компанија државата неодамна ја откупи од Renault, да претстави нова Classic верзија на моделот Grant. Овој модел ќе се произведува само од делови произведени во Русија и купени од сојузниците, а основната верзија чини 761.000 рубли или околу 13.000 евра.
Овој модел доаѓа без голем број безбедносни системи како што се воздушни перничиња за совозачот, ABS и клима-уред. Го придвижува 1,6-литарски четирицилиндричен мотор кој развива 90 КС и не ги задоволува актуелните европски стандарди, туку оние од 1996 година.
Ова во секој случај е ретрограден чекор за земјата, но руските власти очигледно се подготвени да го жртвуваат квалитетот и безбедноста поради инвазијата. Гласините велат дека Lada планира да понуди „осиромашени“ верзии на други модели како Niva.
Состојбата за постојните сопственици на возила исто така не е добра, бидејќи станува сè потешко да се набават резервни делови, а поправките стануваат поскапи.
Елдар Гаџијев, сопственик на четири автомобили Škoda кои ги користи за такси превоз, за The Guardian изјави дека овластените служби се немоќни во случај на дефекти, додека приватниците имаат листа на чекање од неколку месеци.
Тој додаде дека резервни делови тешко се наоѓаат и дека се екстремно скапи, понекогаш и поскапи од самиот автомобил. Дел од деловите до кои успеал да дојде биле крадени.
Едноставните потребни производи, како масло, во Русија денес се десетпати поскапи од порано, а тоа е последица на инвазијата на Украина.