Министерството за внатрешни работи вчера спроведе засилена акциска контрола на територијата на државата, при што санкционираше 295 возачи кои се движеле со брзина поголема од дозволената.
Од нив, 14 возила се движеле со брзина над 50 километри на час повеќе од дозволеното, а едно возило се движело со дури над 70 километри на час повеќе од дозволената брзина. Притоа, 194 возачи ја пречекориле брзината во населено место, а 101 надвор од населено место.
На територија на Град Скопје во текот на вчерашниот ден изречени се вкупно 196 мерки, меѓу кои за возење повеќе од дозволената брзина 106 санкции, 14 мерки за возење без возачка дозвола, 9 санкции за прекршоци што ги прават возачите на мотоцикл, 4 мерки за користење мобилен телефон, 12 за возење под дејство на алкохол, 4 за нерегистрирани возила, 8 санкции за минување на затворен сигнал (црвено светло).
Во Битола синоќа биле санкционирани возачи кои управувале возила под дејство на алкохол, додека во Кочани се изречени казни за возачи кои не ги почитувале сообраќајните правила и прописи.
Како што информира МВР, во Битола синоќа од 22:00 до 4:00 часот изутрина биле санкционирани 24 возачи.
Во рамки на проектот „Безбедно лето 2022“, во текот на изминатата вечер, од 21:00 до 4:00 часот изутрина во Кочани биле санкционирани 28 возачи, од кои 9 за возење без возачка дозвола, 8 за возење под дејство на алкохол… На сите прекршители изготвени им се соодветни поднесоци.
Од МВР најавија дека засилените акциски контроли продолжуваат и во наредните денови.
„Апелираме до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта“, се наведува во соопштението на МВР.