Поранешниот француски претседател Никола Саркози денеска беше проглсен за виновен за корупција и доби затворска казна во времетраење од 3 години од кои две се условни.
Судијката Кристин Ме рече дека 66-годишниот поранешен политички лидер „го користел својот статус како поранешен претседател за да прави сериозни прекршувања на законот“.
На Саркози му беше судено поради обвинувањата за обид за поткуп на судијата Жилбер Азибер, на кого му понудил добро платена работа во Монако доколку за возврат му открие информации околу криминалната истрага врз политичката партија на Саркози, УМП.
Унијата за народно движење беше под истрага за примање на нелегални парични средства од бизнисменката Лилјан Бетенкур кога Саркози беше претседател на Франција.
Саркози, кој беше претседател од 2007 до 2012 година, чека уште едно судење пролетва. Нему, заедно со уште 13 лица, ќе им се суди под обвинение за незаконско финансирање на неговата претседателска кампања во 2012 година.
