Ал Пачино играше некои од најпознатите улоги во филмската историја, вклучувајќи ги Мајкл Корлеоне во The Godfather, Тони Монтана во Scarface и Винсент Хана во Heat. Иако освои Оскар за улогата во филмот Scent of a Woman, за време на својата кариера одби неколку големи филмски понуди, пишува списанието Far Out.
Една од нив беше улогата на њујоршкиот полицаец Џон Меклејн во акциониот хит Die Hard („Умри машки“) од 1988 година. Филмот го следи полицаецот кој на Бадник сам се соочува со група терористи откако тие преземаат облакодер во Лос Анџелес, а денес се смета за еден од најдобрите акциони филмови на сите времиња. Улогата на крајот му припадна на Брус Вилис и го претвори во една од најголемите ѕвезди во Холивуд.
Потсетувајќи се на одбиената понуда, Пачино познато рече: „Му ја направив кариерата на тоа момче“, мислејќи на Вилис. Иако не е јасно дали се шегувал, многумина веруваат дека „Умри машки“ е филмот што го лансираше Вилис меѓу најголемите акциони актери.
Пачино не го одби само „Умри машки“. Претходно изјави дека не го разбрал сценариото за Star Wars, поради што не ја прифатил улогата на Хан Соло, а одби и улоги во филмовите Apocalypse Now, Pretty Woman и Goodfellas.
На крајот, се покажа дека не изгубил многу поради тие одлуки. Пачино изгради една од најуспешните актерски кариери во Холивуд, додека улогата на Џон Меклејн стана заштитен знак на Брус Вилис и една од најпознатите во историјата на акционите филмови.
