По 14 години успешна работа на Балканот, регионалниот телевизиски проект Al Jazeera Balkans се затвора.
Станува збор за филијала на катарскиот медиумски концерн, кој со голем успех работи на Балканот, со седиште во Сараево од 2011 година. Al Jazeera Balkans го покриваше регионалниот пазар со канцеларии во Белград, Загреб, Подгорица, Скопјe, Љубљана и Приштина.
Во изминатите 14 години, Al Jazeera Balkans е особено препознатлива по својата оригинална содржина поврзана со документарниот сегмент, но и со голем број други проекти. Таа е првата арапска телевизиска станица што емитува програма на јазик различен од арапскиот и англискиот.
Al Jazeera Balkans е присутна во Сараево од средината на септември 2010 година, кога ја купи локалната телевизиска станица NTV Studio 99 од компанијата PEP во сопственост на Адил Куленовиќ за 2,3 милиони КМ, што беше износот на долговите на таа телевизија кон државата.
Во 2018 година, Al Jazeera Balkans го основа AJB DOC, фестивал на документарен филм, кој се одржува во Сараево секој септември.
Причините за затворањето сè уште не се објавени, но се претпоставува дека станува збор за деловна одлука на Доха поради финансиски причини, пишува босанскиот медиум Klix.
