Објавени се првите фотографии од долгоочекуваните биографски филмови за Битлс во режија на Сем Мендес. Амбициозниот филмски проект ќе се состои од четири одделни филмови, секој посветен на член на познатиот бенд.
Актерската екипа, објавена на 1 април минатата година, ги вклучува Харис Дикинсон како Џон Ленон, Пол Мескал како Пол Макартни, Бери Кеоган како Ринго Стар и Џозеф Квин како Џорџ Харисон. Филмовите треба да пристигнат во кината во април 2028 година.
Обожавателите сега првпат имаа можност да ги видат актерите што ги играат членовите на легендарната ливерпулска четворка што го освои светот во 1960-тите. Нивните безвременски хитови, како што се „Here Comes the Sun“, „Let It Be“ и „Hey Jude“, се исто толку популарни и денес.
Објавените промотивни фотографии се крупни кадри на актерите како членовите на бендот и се чини дека ги прикажуваат во различни точки од нивните кариери. Повеќето од фотографиите изгледаат како да се од крајот на 1960-тите и почетокот на 1970-тите, при што само Пол Мескал го отелотворува изгледот на Макартни од почетокот на 1960-тите.
Пол Мескал, познат по својата виткана коса, носи препознатлива фризура од почетокот на 1960-тите „mop top“ за улогата на Пол Макартни. Првата објавена фотографија е сместена во легендарниот Cavern Club, местото каде што Битлс за прв пат се здобија со слава.
Ѕвездата на Stranger Things, Џозеф Квин, позира замислено како Џорџ Харисон на промотивните фотографии, а неговата подолга коса сугерира сцена од 1970-тите.
Бари Кеоган, познат по улогата во филмот Saltburn, го толкува Ринго Стар во неговиот изглед од крајот на 1960-тите. Харис Дикинсон, ѕвездата на филмот Babygirl, на фотографијата ги носи препознатливите очила на Џон Ленон.
