По повеќе од две децении активно присуство на алтернативната сцена, скопската група Д.Н.О најавува својот прв акустичен концерт, кој ќе се одржи на 25 мај – Денот на младите, во кино Фросина при Младинскиот културен центар (МКЦ).
Овој настан е замислен како ретко и интимно музичко доживување, каде бендот ќе се претстави во поинакво светло, со акустични аранжмани и поблиска комуникација со публиката. Вечерта ќе биде посветена на емоции, приказни и нова димензија на нивните веќе препознатливи композиции.
Д.Н.О е алтернативен инди психоделичен рок бенд од Скопје, формиран кон крајот на 1999 година. Основната постава ја сочинуваат Владимир Поп-Христов – Мио (вокал), Гоце Стевковски (тапани), Иван Бејков (бас), Емин Џијан (клавијатури), Саша Спасовски – Крокер (гитара), Кире Најдовски (гитара) и Бојан Угриновски како музички техничар. Нивниот звук е инспириран од рокот на 80-тите и 90-тите, со силни психоделични и ретро елементи, што им овозможи да изградат култен статус на независната македонска музичка сцена.
Бендот го објави својот деби албум „Тишина“ во 2004 година, со материјал отпеан на македонски и англиски јазик, а од тој период датира и соработката со познатиот продуцент Малколм Брн, кој има работено со имиња како Боб Дилан и Иги Поп. Д.Н.О се истакнуваат со енергични настапи во живо и автентична сценска естетика, а нивната музика комбинира алтернативен рок, пост-панк и психоделија, често обоена со носталгија за минатите децении.
Во текот на своето постоење, бендот има настапувано на бројни фестивали и самостојни концерти низ Македонија, меѓу кои се издвојуваат настапите на „Peace Unlimited Festival“, „Скопско културно лето“, како и промотивниот концерт на Мизар. Во 2007 година, нивната музика беше инспирација за експерименталниот рокенрол филм „Magical Mystery Cure“.
По неколку промени во составот и подолга пауза, Д.Н.О се вратија на сцената во 2021 година со нови синглови, а овој акустичен концерт во МКЦ е нивно прво вакво појавување по повеќе од 20 години работа. Моментална постава на бендот е Владимир Поп Христов (вокал и бас), Бодин Попов (тапани), Филип Попов (гитара), Петар Лукиќ (клавијатура) и Гордан Попов (гитара).
Билетите се достапни преку веб-страницата на МКЦ и на билетарата во просториите на центарот. Активностите на бендот може да се следат на нивните профили на Instagram, Spotify и YouTube.
