Генералните секретари на двете најголеми партии во земјава излегоа со проекции во кои најавуваат победа на својот табор на денешните предвремени парламентарни избори.
„Граѓаните ја сфатија сериозноста на ситуацијата во која се наоѓа државата и во огромно мнозинство одлучија за обнова“, изјави генералниот секретар на ВМРО-ДПМНЕ, Игор Јанушев.
„Победуваме со над 10.000 гласа и водиме со 2 спрема 1 во Гази Баба, Илинден, Кривогаштани, Свети Николе…Со обработени околу 20 проценти од гласовите имаме разлика од околу седум пратеници“, изјави Јанушев.
Тој изјави дека на денешните избори имало сериозни нерегуларности за кои, како што рече, биле известени ОДИХР и меѓународната заедница.
Генералниот секретар на СДСМ, Љупчо Николовски, по затворањето на избирачките места во 21 часот, рече:
„Првичните резултати коишто стигаат до мене од избирачките места покажуваат огромно водство на СДСМ и коалицијата Можеме. Очекуваме сигурна победа за СДСМ, сигурна победа и чист мандат за коалицијата Можеме. Победа за нашиот концепт кој што води напред кон развој и европска интеграција.“
СДСМ на 33 отсто обработени податоци од гласањето на предвремените парламентарни избори води со тројца пратеници. Трендот е во постојан раст, брифираат извори од СДСМ за МИА.
Тој упати благодарност до сите граѓани што излегле да гласаат, почитувајќи ги мерките за заштита од коронавирусот и го дале нивниот придонес кон развојот на нашето демократско општество.
„Сведоци сме на демократски и професионално спроведен изборен процес и затоа треба да бидеме горди. Во овие вонредни околности уште еднаш потврдуваме дека нашите институции можат да се носат со сите предизвици и пред сѐ да ги заштитат граѓаните нивното здравје, но и да обезбедат слободен, фер и демократски изборен процес“, нагласи Николовски.
Тој посочи дека изборниот ден минал во најдобар ред.