Бенџамин Кео, син на музичарката Лиса Мари Присли и внук на рокенрол легендата Елвис Присли, почина на 27 години.
Лиса Мари е „скршена од болка“ поради загубата на синот од бракот со Дени Кео, рече нејзиниот портпарол.
„Скршена е од болка, неутешна и затечена од веста, но се труди да биде силна за 11-годишните близнаци и најстарата ќерка Рајли“, изјави портпаролот Роџер Видиновски за People.
„Го обожаваше момчето. Тој беше љубовта на нејзиниот живот.“
Лиса Мари, ќерката на Елвис Присли, е мајка на 31-годишната Рајли Кео, како и 11-годишните близнаци Харпер и Финли, од бракот со Мајкл Локвуд.
Бенџамин Кео се самозастрелал со огнено оружје синоќа во Калабасас, Калифорнија, објави TMZ.
Во 2012 година Бенџамин, заедно со другите деца на Лиса Мари, беше дел од музичкото видео за нејзиниот римејк на хитот на Елвис од 1954 година „I Love You Because“.
Лиса Мари беше особено блиска со Бенџамин. На Денот на мајката во 2009 година двајцата ставија исти тетоважи на „келтски јазол на вечноста“ што според неа означува „вечна љубов и поврзаност“.
