Викендов почнува новата сезона во Серија А која ќе почне без публика на стадионите со исклучок на два натпревара каде регионалната власт отиде контра Владата.
В сабота од 18 часот официјално ќе почне сезоната 2020/21 во Серија А и тоа со натпреварот помеѓу Фиорентина и Торино на „Артемио Франки“ стадионот во Фиренца. Во вечерниот термин на „Марк'Антонио Бентегоди“ ќе се сретнат Верона и Рома. Двата натпревара ќе се играат без публика.
Но, в недела Италијанците конечно ќе можат да се појават на стадион. Неделната понуда содржи четири натпревари од кои на два ќе биде дозволен влез на публика.
Се работи за два натпревара кои се играат во регионот Емилија-Ромања и тоа во градовите Парма и Реџо Емилија. Нема да има којзнае колку публика, туку на секој натпревар под посебни безбедносни протоколи ќе биде дозволен влез на илјада гледачи кои прв пат по март ќе можат во живо да гледаат натпревар од Серија А. Италијанската Влада не даде дозвола за присуство на публика, но регионалната власт одлучи поинаку, па затоа публика ќе има само на стадионите во Емилија-Ромања.
Гледачи ќе има на „Енио Тардини“ од 12:30 часот каде Парма го пречекува Наполи, како и на „Мапеи“ каде Сасуоло од 18 часот ќе го нагости Каљари. Инаку, Сасуоло е од истоимениот град Сасуоло, но натпреварите ги игра на стадионот на Реџана во блискиот град Реџо Емилија бидејќи неговиот стадион е премал.
В недела играат и Џеноа - Кротоне од 15 часот и Јувентус - Сампдорија од 20:45, но тие ќе се играат без публика. Првото коло ќе го затворат Милан и Болоња в понеделник вечер.
Натпреварите Беневенто - Интер, Удинезе - Специја и Лацио - Аталанта се одложени за на 30-ти за да им се дадат повеќе денови одмор на играчите на Интер кои играа во Лига Европа, на Аталанта во Лигата на шампиони и на Специја во баражите за пласман во Серија.
