Кинеското воено воздухопловство објави промотивна видеоснимка од која се добива впечаток дека кинеските сили го нападнале американскиот аеродром Андерсен на островот Гвам во Тихиот Океан.
Видеото беше објавено викендов, а во него се гледаат кинески H-6K бомбардери кои можат да носат нуклеарно наоружување. На средината на видеоснимката, кинески пилот притиска копче и лансира ракета кон мета што многу потсетува на сателитски снимки од аеродромот Андерсен.
Видеоснимката е насловена „Богот на војната H-6K тргнува во напад“. Ако ви се чини дека снимката ги има сите елементи на трејлер за холивудски блокбастер, тоа е така бидејќи навистина има – видеоснимката е „сечена, лепена и монтирана“ со кадри од американските филмови „Transformers: Revenge of the Fallen“, како и „The Rock“.
Промотивниот видеоспот се пoјави во време на заострени односи меѓу Кина и САД, како на економски, така и на политички план. Кинезите веќе подолго време се обидуваат да ги спречат САД да ја „контролираат“ територијата Тајван и ги повикуваат да ги прекинат воените операции во Јужното Кинеско Море, но Американците инсистираат дека имаат „слобода на навигација“.