Децата се најдобрите критичари, благодарение на нивната љубопитна проникливост и чиста искреност.
По премиерата на првиот македонски детски семеен филм „Стела“ на режисерот Стојан Вујичиќ со која отвори годинашното издание на Фестивалот на европски филм Синедејс, почнаа да стигнуваат и првите импресии.
Нашите првични импресии од „Стела“ беа дека екипата одговори на предизвикот да го направи првиот македонски семеен детски филм на јазик што е разбирлив за децата и допира до возрасните и дека ја оправда еуфоријата околу долгоочекуваниот филм во чија срж е важноста на детето во семејството и светот воопшто.
Исто така се согласуваме со видувањето за филмот на седумгодишната Лена М. Која напиша своја искрена критика за филмот.
Екипата на филмот ја објави критиката на својата фан страница на Facebook, а ние ви ја пренесуваме во целост.
„За филмот СТЕЛА
Го гледав филмот Стела. Многу ми се допадна, Никола е главниот лик. Никола голем дел е тажен, родителите често се караат. Другарите во школо му се смееја, од љубомора. Тој од тага бега од дома. Да најде љубов и мир. Оди во планина го наоѓа кучето Стела. Не зборуваат ама се сакаат. Љубовта е потребна на секого.
ЛЕНА М. 7 год.“
Како што на младиот Петар Маниќ, кому ова му е прва улога во долгометражен филм, му предвидуваме плодна актерска кариера, можеме да кажеме дека и на Лена ѝ претстои кариера во филмската критика, ако тоа го сака, со оглед на тоа дека има чувство за структура на текст, како и исклучителна проникливост.
Филмот е во продукција на ДРИМ ФЕКТОРИ, а главните улоги ги толкуваат: младата шарпланинка Стела, 13-годишниот Петар Маниќ, Дејан Лилиќ, Тони Михајловски, Симеон Дамески и Христина Поповиќ. Сценариото е на Ева Камчевска, кинематографијата е на Ѓорѓи Клинчаров, костимограф на филмот е Милена Миленковиќ, снимател на звукот е Срѓан Бајски и монтажата на Данчо Стефков.