„Што ако ви кажам дека една партија криенка може да го промени светот?“, праша седумгодишната Моли Рајт, една од најмладите TED говорнички досега.
Ова девојче од Австралија одржа говор пред сто луѓе, а на сцената ѝ се придружија едногодишниот Ари и татко му Амарјот, кои ѝ помогнаа да ги илустрира своите ставови.
„Мојот говор денес открива неколку моќни работи што можете да ги направите како возрасни за да нѐ обликувате нас децата во возрасните луѓе кои ќе станеме еден ден. Како го знам тоа? Бидејќи тоа го направија моите родители и луѓето околу мене. Знам, ја немаат сите деца таа среќа, дури ни некои од моите пријатели, децата на училиште, многу низ целиот свет, но јас навистина би сакала да помогнам во тоа“, рече Моли.
Таа објасни дека мозокот на детето забрзано расте во првите години од животот. До седумгодишна возраст, тој достигнува 90 проценти од големината на мозокот на возрасен, што значи дека првите години се важни.
„Важно е да ги научите децата на животни вештини и да обрнете внимание на пет работи: поврзување, зборување, играње, здрав дом и заедница. Ова се работи што можат да им дадат на децата одличен почеток“, додаде таа.
Рајт вели дека децата на кои им недостасуваат овие важни работи можеби ќе треба да се борат подоцна во животот.
„Секој момент што го поминуваме заедно е можност за поврзување, за разговор и за игра. Замислете ја разликата што би можеле да ја направиме ако сите обрнеме внимание на тоа. Тоа е емоција, а не обична игра. Тоа е нашата иднина. Затоа, една партија криенка навистина може да го промени светот“, заклучи таа.