Ванеса Брајант, вдовицата на легендарниот НБА кошаркар Коби Брајант, жестоко ја критикуваше мајка си, откако таа поведе судска постапка во обид да добие дел од семејното наследство, проценето на околу 600 милиони долари.
Во тужбата на 48 страници што ја поднесе до судот во Лос Анџелес, 68-годишната Софија Урбиета Лејн бара финансиски надомест за својот долгогодишен ангажман како помошничка во домот на Брајант и грижата околу нивните деца, тврдејќи дека кошаркарот ѝ ветил доживотно издржување.
„За жал, ветувањето на Коби Брајант никогаш не го дочека светлото на денот, бидејќи тој почина, а Ванеса Брајант ги презеде сите чекори да ги избегне и поништи неговите ветувања“, се наведува во тужбата поднесена од Лејн.
Отфрлајќи ја тужбата како неоснована и полна со лаги, нејзината ќерка издаде соопштение во кое наведува дека заедно со својот сопруг ѝ дозволиле бесплатно да живее во една од нивните куќи и, притоа, не ја обесхрабрувале самата да се грижи за себе, пренесе весникот Los Angeles Times.
„Сега сака да ми наплати 96 долари по час за наводна работа од 12 часа дневно во текот на 18 години, бидејќи доаѓала да се види со своите внуки. Нејзините наводи се очигледно лажни“, изјави Ванеса.
Нејзиниот сопруг Коби Брајант и 13-годишната ќерка Џијана, загинаа во хеликоптерска несреќа на 26 јануари оваа година, заедно со уште седум други патници.
Ванеса Брајант го наследи управувањето со семејниот имот што финансиски експерти го проценуваат на околу 600 милиони долари.