Џејми Лин Спирс, сестрата на Бритни Спирс, изјави дека поминала низ пекол кога забременила на 16 години.
Нејзините родители инсистирале на абортус или опција за посвојување по пораѓањето.
Според медиумите, Лин ја напишала целата приказна во нејзината авторска книга со наслов „Things I Should Have Said“, а новинар на TMZ успеал да добие само некои делови од книгата што уште не е достапна за пошироката јавност.
„... Дојдоа кај мене в соба. Се обидоа да ме убедат дека мојата идеја да имам дете е погрешна... ‘Оваа одлука ќе ти ја уништи кариерата, премногу си млада. Не знаеш што правиш. Можеме да ти помогнеме со овој проблем, познаваме еден доктор’“, се вели во книгата.
Како што понатаму се наведува, сите биле сигурни дека прекинот на бременоста, поточно абортусот, ќе биде најдобро решение за неа.
Спирс напишала и дека родителите ѝ го одзеле мобилниот телефон за да нема комуникација со надворешниот свет.
Со други зборови, пишува таа, сакале да ја прикријат нејзината бременост. Џејми Лин во книгата пишува дека не се осмелила да ѝ каже на сестра ѝ Бритни за бременоста.
„Ми требаше повеќе од кога било во животот, а не можеше да ми помогне кога бев најранлива. Сè уште ме боли што не можев да ѝ кажам на сестра ми“.