Со дербито на градот Севиља конечно продолжи сезоната во најдобрата шпанска лига.
По три месеци принуден прекин поради пандемијата со коронавирусот, доцна синоќа се реактивираше популарната Ла Лига. Честа да го најават продолжувањето на сезоната ја имаа лутите градски ривали Севиља и Бетис во градското дерби број 131 кое нажалост се играше на празниот „Рамон Санчес Писхуан“.
Откако првите 45 минути минаа во изедначен натпревар, Севиља до победата дојде во вториот дел. Прво Марк Бартра при еден воздушен дуел во казнениот простот го јавна Лук де Јонг по што Антонио Матеу Лаос покажа на белата точка. Лукас Окампос беше сигурен реализатор праќајќи го Хоел Роблес на спротивната страна.
Само шест минути подоцна беше запечатена судбината на Бетис. Окампос овој пат со пета му асистираше на Фернанду кој го дуплираше водството.
Со оваа победа Севиља се зацврсти на третото место, додека Бетис е 12-ти, но по одигрувањето на сите натпревари може да падне на 14. место.
Статистиката на Севиљано вели дека за Севиља ова е 62 победа во сите натпреварувања. Бетис има 38, додека 31 натпревар завршл нерешено.
Вечерва на програмата на Ла Лига се два натпревара: Гранада - Хетафе од 19:30 и Валенсија - Леванте од 22:00. Во дербито Валенсијано ќе настапи и нашиот Енис Барди во дресот на гостите.
