Саудискиот тим Ал-Хилал има огромен кластер на заразени со коронавирусот и не можеше да собере ниту минимум од 13 фудбалери за синоќешниот натпревар.
Дури 15 играчи од составот на Ал-Хилал изминативе неколку дена добија позитивни тестови, па актуелниот бранител на титулата во азиската Лига на шампиони вчера сакаше да истрча на терен со само 8 играчи плус голман. Имаше и резервен голман на клупата како единствена замена.
Ал-Хилал синоќа требаше да игра против тимот на Шабаб ал-Ахли од Дубаи во рамките на последното 6. коло од групата Б, но Азиската фудбалска конфедерација не дозволи натпреварот да се одигра бидејќи Саудијците имаа премалку играчи.
„Доколку еден тим има помалку од 13 играчи (вклучително 1 голман) за некој натпревар, од било која причина (без разлика дали е поврзано со COVID-19 или не), на клубот нема да му биде дозволено да го одигра натпреварот“, го читираше своето правило АФЦ.
Шампионот беше непоразен со 11 бодови и дури и со службен пораз ќе ја поминеше групата, но АФЦ реши да го дисквалификува и сите негови резултати да ги поништи. Така, од оваа група во осминафиналето се пласираа узбекистански Пахтакор и Шабаб ал-Ахли од ОАЕ.
За Ал-Хилал настапуваат францускиот голгетер Бафетимби Гомис, италијанскиот мајстор за слободни Себастијан Џовинко и Перуанецот Андре Кариљо.
Азиската Лига на шампиони се прекина по две одиграни кола, а АФЦ одлучи групите од Западна Азија да се доиграат во Катар по принципот на УЕФА. Источните групи од Ориентот е планирано да се играат во ноември и декември.
