Шарлиз Терон е една од оние актерки чија убавина се чини дека му пркоси на времето.
Во новиот акционен блокбастер „The Old Guard“ што се очекува на Netflix, таа игра токму бесмртна хероина. Нејзиниот лик повеќе е платен убиец отколку Хајлендер, но тематиката на приказната е поблиска до вториот.
Популарната стриминг платформа Netflix се чини се потпира на акциони филмови со големи имиња, по мегахитот од минатиот месец „Extraction“ со Крис Хемсворт во главната улога.
„The Old Guard“ во режија на Џина Принс-Бајтвуд е филмска адаптација на истоимениот стрип на авторот Грег Рука (Lazarus, Wonder Woman) и илустраторот Леандро Фернадез (Deadpool, Punisher: MAX). Главниот лик е Andromache of Scythia или Енди, која поради некоја мистериозна причина со векови е заробена во бесмртен живот.
Заедно со уште неколкумина бесмртни воини таа низ вековите изведува високоризични задачи за богати клиенти. Ени ќе почне да обучува нов бесмртен воин, Нили и заедно со неа и останатите од групата ќе се соочат со нова закана – богат бизнисмен кој дознал за нивното постоење и сака и самиот да добие вечен живот.
Тие исто така се соочуваат со еден нов предизвик на модерното време – да останат незабележани во 21. век во кој светот е опседнат со селфиња и насекаде има камери за надзор.
Стрипот на Рука завршува со големо предавство и неизвесен крај, а филмот ја следи таа приказна, па може да очекуваме и продолжение во иднина.
„The Old Guard“ ќе има премиера на Netflix на 10 јули.
