Фудбалерите на Аргентина ја совладаа селекцијата на Полска со резултат 2:0 и се пласираа во осминафиналето на Светското првенство.
Покрај целосната доминација на „гаучосите“, натпреварот го одбележа и пеналот што Војчех Шчесни го одбрани против Лионел Меси, а одличниот голман на Јувентус по мечот призна дека претходно му понудил на Лео облог досега невиден на фудбалските терени.
Аргентинците беа многу подобар ривал, а во 39. минута беше досуден многу дискутабилен пенал, за многумина непостоечки пенал, откако Шчесни го удри Меси во шеснаесетникот на Полска.
Спорниот момент е што голманот на Јувентус го фаулираше Меси откако Аргентинецот веќе имаше контакт со топката.
Оваа ситуација преку ВАР ја провери холандскиот судија Дени Макели, кој на крајот донесе одлука да покаже на белата точка.
Сепак, Шчесни мајсторски го одбрани пеналот на Меси, кој упати силен удар.
Полскиот голман во својата изјава по натпреварот откри дека бил толку уверен дека нема да биде досуден пенал што се обложил 100 евра со Меси додека ВАР ја разгледувал ситуацијата на стадионот 974.
„Не мислев дека ќе има пенал. Зборував со Меси пред пеналот и му реков дека можам да се обложам 100 евра дека судијата нема да го досуди. Така го загубив облогот против Меси. Знам дали тоа е дозволено на Светското првенство и веројатно ќе бидам казнет, но во моментов не ми е гајле“, рече Шчесни со шеговит тон.
И покрај поразот и слабата игра, Полска напредуваше поради подобра гол разлика од Мексико.
Аргентина во осминафиналето ќе игра против Австралија и овој натпревар е закажан за в недела. Ден претходно во осминафиналето својата пресметка ќе ја имаат Полска и Франција.